ازاى تجدد رخصة عربيتك وايه هى الاجراءات بالتفصيل عشان تجدد رخصة العربية ويا ترى التكلفة كام
من واقع خبرة عملية بص يا سيدى
حاول تكون فى المرور من بدرى علشان تلحق تخلص اجرائاتك بسرعة
الاجراءات بتبدأ بانك بتشترى ورق الفحص ودا عبارة عن 3 ورقات عبارة عن فحص فنى وفحص بيئى وايصال الطفاية تمنهم 40 جنيه
ولو المرور التابع ليك منظم خد دور لعربيتك وبعد كده اطلع اشترى طفاية الحريق لو مش معاك وتمنها 305 جنيه
لو معاك طفاية اصلا اتاكد ان معداش عليها 5 سنين لان صلاحية الطفاية بتكون 5 سنين والرقم بيكون مدقوق على الطفاية
لو الطفاية بتاعتك تمام هتختم الوصل ومش هتدفع فلوس وبعدها تعمل الاتى
هتروح الشباك اللى جنب الطفاية علشان تجيب المثلث لو مش معاك مثلث
بعدها هتروح على الشباك اللى بعده عشان تجيب شنطة الاسعافات الاوليه واللى المفروض انك بتشتريها مرة واحدة بس لكن بيخلوك تشترى كل مرة تيجى تفحص فيها اجبارى مش عارف ليه بصراحة
تمن شنطة الاسعافات الاوليه دلوقتى 220 جنيه ودا كتير جدا عليها بصراحة بس ماشى
هتقابل بقى ناس بتحاول تشتغلك وتفهمك ان الحاجات الىل هيعرضوها عليك اجبارية ولازم تعملها بدا ما مهندس الفحص يرجعك تانى ودا جزء الاشتغالات ومتخليش حد يشتغلك
اول اشتغالة هى فحص الاطارات ودا تمنه 65 جنيه وملوش لازمة
تانى اشتغالة هى استيكر عاكس ودا تمنه 50 جنيه وبرضو ملوش اى لازمة
بعد كده اشتغاله حسب مزاجك بقة وحتى لو جبتهم فدا يرجعلك وبمزاجك
القمع والصديرى العاكس وانا جبتهم للامان بصراحة دول تمنهم كان 165 جنيه
بعد ما تخلص الكلام دا هترجع لعربيتك او تجيب مهندس الفحص عشان يبص عالعربية ويكون العامل اللى معاه رفع البصمات بتاعة الموتور والشاسية
وبيكون معاك طبعا ايصال الطفاية بعد ما تختم وتمضى من مهندس الفحص تاخد الورق اللى معاك وتطلع على مبنى المرور نفسه عشان تبدأ الجزء الادارى فى عملية تجديد رخصة السيارة
اول حاجة هتعملها تطلع شهادة المخالفات وتدفع المخالفات اللى عليك ولو مش عليك مخالفات هتدفع 20 جنيه عشان تاخد الشهادة دى
المهم بعد كده هتروح مصور بطاقتك عشان تعمل استعلام امنى عنك انت شخصيا ودا بيبقى ختم على صورة البطاقة الشخصية بتاعتك
بعد كده هتروح تشترى حافظة ب 30 جنيه وملف فيه ورق وكتيب تعليمات ب 70 جنيه
اى صرف فلوس وخلاص !!
بعدها بقى تروح تاخد رقم علشان تدخل على شباك التجديد وكده تبقى انت قطعت شوط طويل فالعملية هانت خلاص اصبر هو اصلا مشوار ما يعلم بيه الا ربنا !!!
هتدخل الشباك وهتدى كل الورق اللى معاك للراجل اللى على الشباك دا وهيبدأ يحسب حساباته كده عشان يقوللك هتدفع كام
هيبعتك الخزنة عشان تجيب ورق التجديد ودا تمنه 235 جنيه
وهيقوللك على الرسوم اللى هتدفعها وانا عربيتى موديل 2014 و 1600 سىى سى دفعت عليها حوالى 2750 جنيه
دى شاملة حاجات كتير بقى منها الضريبة ورسم تنمية موارد الدولة والملصق الالكترونى وكله كله
برضو هتروح تدفع التامين الاجبارى وانا دفعت فيه 320 جنيه لل 3 سنين
كله دفع دفع دفع !!
المهم بعد ما حضرتك تخلص الكلام دا وتاخد الوصولات اللى دفعت بيها والورق والدمغة والذى منه هترجع للراجل تانى عالشباك وتديله كل الكلام دا وهيخليك تملا معاه الورق او هو هيملاه
بعدها هيقوللك روح على شباك تسليم الرخص واستنى رخصتك
هتقعد حوالى من ساعة ل ساعتين عشان تستلم رخصتك والف مبروك الرخصة
الرخصة ل 3 سنين اتكلفت حوالى 4350 جنيه شاملة كل حاجة
ارجو انكم تستفيدوا بالتجربة واتمنى لكم رخصة سعيدة :)
